SayHello

ඉංග්‍රීසි කතා කිරීමේදී බොහෝ දෙනෙක් සිදු කරන වැරදි හඳුනාගනිමු

2K Shares

අපි හැමෝම කුඩා කාලයේදී සිංහල කතා කරන්න පටන් ගත්තෙත් වැරදි වැරදි නේද? ඒත් දැන් අපි හැමෝටම හොඳටම සිංහල කතා කරන්න පුළුවන්. ඉතින් ඉංග්‍රීසි භාෂාව කතා කරන්න පුරුදු වෙන ආධුනිකයෝ විදිහට ඔයාලා අතින් වැරදි සිදු වෙන එකත් සාමාන්‍ය දෙයක්. දිගින් දිගටම ඉංග්‍රීසි පුරුදු පුහුණු වෙද්දී මේ වැරදීම් සිදු වෙන එක අනිවාර්යයෙන්ම මඟ හැරිලා යාවි. සමහරවිට ඔබ ඉංග්‍රීසියෙන් කියන දේවල් වැරදි නැහැයි කියලා ඔබ හිතාගෙන ඉන්නවා වෙන්න පුළුවන්. ඒත් සමහරවිට ඒවා වැරදි වෙන්න පුළුවන්. ඒ නිසා මෙවර “SayHello” ලිපිය තුළින් අපි ඔබට ඉංග්‍රීසි කතා කිරීමේදී බොහෝ දෙනෙක් අතින් සිදුවන වැරදි ගැන කියන්න හිතුවා.

ඇයි අපි ඉංග්‍රීසි කතා කිරීමේදී සිදුවන වැරදි ගැන දැනගෙන ඉන්න ඕනේ? ඉංග්‍රීසි කතාවට හුරු වෙන ආධුනිකයෙක් වශයෙන් ඉංග්‍රීසි කතා කිරීමේදී සිදුවන වැරදි දැනගෙන සිටීම ඉතා වැදගත්. එතකොට ඔබට ඒ වැරදි මඟ හරවා ගනිමින් නිවැරදි ඉංග්‍රීසිම දිගටම කතා කරන්න හැකියාව ලැබෙනවා. ඔබ අතින් ඉංග්‍රීසි කතා කිරීමේදී වැරදි සිදුවනවා කියලා ලැජ්ජාවට පත් වෙන්න ඕනේ නැහැ. මොකද ඉංග්‍රීසි තමන්ගේ මව් භාෂාව වෙච්ච අය අතිනුත් මේ වගේ වැරදි සිද්ද වනවා. අපි දැන් බලමු බොහෝ දෙනා ඉංග්‍රීසි කතා කිරීමේදී සිදු කරන වැරදි මොනවාද කියලා. මෙහිදී අපි වැරැද්ද සහ එය නිවැරදිව කිව යුතු ආකාරය ගැන උදාහරණ සහිතව ඔබට කියලා දෙනවා.

කාලයට ගැළපෙන ලෙස ක්‍රියාපදය භාවිතා නොකිරීම

විවිධ අධ්‍යනයන් වලින් හොයාගෙන තියෙනවා ඉංග්‍රීසි කතා කිරීමේදී බොහෝ දෙනා වරද්ද ගන්නේ මෙලෙස කාලයට ආදාලව නිවැරදි ක්‍රියාපදය භාවිතා නොකිරීමෙන් බව. එය සිදු වන්නේ ව්‍යාකරණ පිළිබඳ දැනුම මදි කම හේතුවෙනුයි. ඒ නිසා ඉංග්‍රීසි කතාවට ආධුනිකයෙක් ලෙස අතීත කාල, වර්තමාන කාල, අනාගත කාල වාක්‍ය වලදී ක්‍රියාපද යොදාගන්නා ආකාරය ගැන ඔබේ අවධානය යොමු කරන්න.

වැරදි – I didn’t went to the school today.
නිවැරදි – I didn’t go to the school today.
වැරදි – I have work hard for this.
නිවැරදි – I have worked hard for this

වචන පටලවා ගැනීම

බොහෝ වෙලාවට එක හා සමාන උච්චාරණය සහිත එහෙත් විවිධ තේරුම් තිබෙන වචන ඉංග්‍රීසි භාෂාවට ආධුනිකයන්ට පැටලෙනවා. සමහර වචන වල අක්ෂර වින්‍යාසය සහ උච්චාරණය කරන ආකාරය එකම වගේ. මේ නිසා ඔබට පැටලෙන්නට පුළුවන්. එවිට ඔබ කියන දේ නියම අර්ථය අසා සිටින පුද්ගලයාට තේරෙන්නේ නැති වෙන්න ඉඩ කඩ වැඩි. ඒ වගේම අනිත් පුද්ගලයා කියන දේ තේරුම ඔබට නිවැරදිව වැටහෙන්නේ නැති වෙන්නත් පුළුවන්. උදාහරණ ලෙස බොහෝ දෙනාට පහත දක්වා තිබෙන වචන පැටලෙන්න පුළුවන්.

Accept (ඇක්සෙප්ට්) – පිළිගන්නවා/බාරගන්නවා – I accept your invitation.
Except (එක්සෙප්ට්) – හැර/බැහැර කරනවා – He will eat anything except bread.
Knew (නිව්) – දැන සිටියා – She knew Sunil since childhood.
New (නිව්) – අළුත් – Nuwan has bought a new pair of shoes.

මේ වගේ එකම විදිහට උච්චාරණය කරන එහෙත් විවිධ තේරුම් ඇති වචන ගැන තව දුරටත් දැනගන්න “SayHello” තුළින් ඉදිරිපත් කළ “එක වගේ ශබ්ද වන ඒත් වෙනස් තේරුම් තිබෙන ඉංග්‍රීසි වචන හඳුනාගනිමු” ලිපිය කියවන්න.

මින් ඉදිරියට ඔයා කාත් එක්ක හරි සංවාදයට යද්දී මෙවැනි එක වගේ වචන ගැන අවධානයක් දක්වන්න.

ඉංග්‍රීසි නිපාත පද (prepositions) භාවිතය

ගොඩක් දෙනෙක්ට වැරදෙන තවත් තැනක් තමයි මේ. ඉංග්‍රීසි භාෂාවේ එන prepositions එහෙමත් නැත්තම් නිපාත පද වන To, For, In, On, With, Before, After, At වැනි වචන බොහෝ දෙනෙක් නිවැරදිව භාවිතා කරන්නේ නැහැ. බොහෝ විට වාක්‍ය වලට අවශ්‍ය නැති අවස්ථා වලදීත් ඒවා යොදාගන්නවා දක්නට ලැබෙනවා. එම නිසා ඉංග්‍රීසි භාෂාවට ආධුනිකයෙක් වශයෙන් ඔබ මේ prepositions වාක්‍ය සඳහා නිවැරදිව යොදාගන්නා ආකාරය ගැන දැන ගෙන සිටින්න.

වැරදි – She will inform to your brother.
නිවැරදි – She will inform your brother.
වැරදි – We arrived in Monday.
නිවැරදි – We arrived on Monday.

ඉංග්‍රීසි භාෂාවේ prepositions නිවැරදිව භාවිතා කරනා ආකාරය ගැන තවත් දැනගන්න ඔබට පහත දැක්වෙන YouTube වීඩියෝව තුළින් හැකි වේවි.

“A/An” සහ “The” භාවිතය

ඉංග්‍රීසි භාෂාවේදී බහුලවම භාවිතා වන වචන තමයි “A/An” සහ “The” කියන්නේ. ගොඩක් වෙලාවට මේ වචන භාවිතය බොහෝ දෙනා අතින් ගිලිහී යනවා දක්නට ලැබෙනවා. එත් මේ වචන ඔබ ඉංග්‍රීසි භාෂාවෙන් යම් දෙයක් නිවැරදිව ප්‍රකාශ කිරීමේදී යොදාගත යුතුමයි. ඕනෑම ඉංග්‍රීසි වාක්‍යයක හැමතිස්සෙම වගේ “A/An” සහ “The” භාවිතා වනවා අපිට දක්න්නට ලැබෙනවා.

වැරදි – There is cat.
නිවැරදි – There is a cat.
වැරදි – I’m going to supermarket.
නිවැරදි – I’m going to the supermarket
වැරදි – He is eating a ice cream.
නිවැරදි – He is eating an ice cream.

මේ වගේ “A/An” සහ “The” නිවැරදිව වාක්‍ය වලට යොදාගන්නේ කොහොමද කියලා අපි “SayHello” තුළින් ඉදිරිපත් කළ “a/an සහ the නිවැරදිව භාවිතා කරන්නේ කෙසේද?”  කියන ලිපිය කියවලා බලන්න.

සාමාන්‍ය අවස්ථාවකදී සහ රාජකාරී අවස්ථාවකදී කතා කළ යුතු ආකාරය පටලවා ගැනීම

අපි දන්නවා සාමාන්‍ය අවස්ථාවකදී හෝ එදිනෙදා ජීවිතයේදී කතා කළ යුතු ආකාරයට නෙමෙයි අපි රාජකාරීමය අවස්ථාවකදී කතා කළ යුත්තේ. රාජකාරී කටයුතු වලදී සාමන්‍ය ජීවිතයේ කතා බහ කරන විදිහට කතා කරන්න ගියොත් ඔබ ලෝක අමාරුවක වැටෙන්න පුළුවන්. එහෙත් ඉංග්‍රීසි භාෂාවට ආධුනිකයින් වශයෙන් ඔබ අතින් මෙවැනි අවස්ථාවලදී ඉංග්‍රීසියෙන් කතා කරන්න ගියාම වැරදීම් සිදුවෙන්න ඉඩකඩ වැඩියි. මොකද ඉංග්‍රීසි භාෂාවේ කට වහරත් ගොඩක් අඩංගු වන නිසා. මේ කට වහර අපි රාජකාරී අවස්ථාවලදී භාවිතා කරන්නේ නැහැ කියලා ඔබ මතක තබාගත යුතුයි.

රාජකාරී අවස්ථාවකදී;

වැරදි – Hey, what’s up?
නිවැරදි – Hello, How is it going?

එම නිසා ඔබ කතා කරන විට අවස්ථාවට උචිත ලෙස කතා කිරීමට ඉගෙන ගන්න.

අපි මේ ලිපිය තුළින් සඳහන් කළේ ඉංග්‍රීසි භාෂාවට ආධුනිකයින් අතින් සිදුවන සුළු වැරදි කිහිපයක් ගැන පමණයි. මීට අමතරව ඔබට තවත් වැරදි ගැන දැනගන්න ඕනේ නම් මේ වීඩියෝව නැරඹීම තුළින් පුළුවනි.

අපි හිතනවා මේ ලිපිය තුළින් ඉංග්‍රීසි කතා කිරීමේදී නොදැනුවත්වම ඔබ අතින් වන වැරදි ගැන ඔබට අවබෝධයක් ලැබෙන්න ඇති කියලා. මේවා ඕනෑම කෙනෙක්ට ඉතා පහසුවෙන් නිවැරදි කරගන්න පුළුවන්. දිගින් දිගටම ඉංග්‍රීසි කතා කරද්දී ඔබට මේ වැරදි හදාගැනීමට හැකියාව ලැබේවි. නොනවත්වාම ඉංග්‍රීසි කතාව පුරුදු වෙන්න. එවිට මේ වැරදි ඔබ අතින් සිදුවන එකක් නම් නැහැ.

යාළුවන්ටත් දැනගන්න Share කරන්න.

Selected images extracted from Pexels.com

2K Shares

Facebook Comments

Add comment